Քաղաքաշինության կոմիտեում ընդունել են Միավորված ազգերի կազմակերպության զարգացման ծրագրի հայաստանյան գրասենյակի ներկայացուցիչներին Կանաչ կլիմայի ֆոնդի ծրագրի ղեկավար Ռուսուդան Տուշուրիի գլխավորությամբ։ Հստակեցվել են առաջիկա համագործակցության ուղղությունները։

Դիտարկվել է էներգաարդյունավետությանն առնչվող ամերիկյան և եվրոպական նորմերի տեղայնացման գործընթացին ՄԱԶԾ աջակցության հնարավորությունը։ Կարևորվել է քաղաքաշինության ոլորտի մասնագետների շարունակական մասնագիտական զարգացման կազմակերպման շրջանակում համագործակցությունը և էներգաարդյունավետության միջոցառումների վերաբերյալ գիտելիքների, կարողությունների զարգացումը:

Քննարկվել է նաև նոր կառուցված հասարակական նշանակության շենքերի էներգետիկ աուդիտ իրականացնելու գաղափարը։ Որոշվել է նախապատրաստել համաձայնագիր՝ կոմիտեի համակարգմամբ մեկնարկած վերակառուցման ծրագրերի շրջանակում էներգաարդյունավետության միջոցառումների համաֆինանսավորման և համագործակցության այլ ուղղությունների նախանշման նպատակով։